4-р сарын 4-ний өдөр Элчин сайд Шэнь Миньжуань БНХАУ-аас Монгол Улсад суугаа ЭСЯ-ны ажилтнууд, Монгол дахь Хятадын хөрөнгө оруулалттай аж ахуйн нэгжүүд болон Монголд суугаа хятад иргэдийн төлөөллийг ахлан Улаанбаатар хотын захын оршуулгын газарт очиж, тус ЭСЯ-ны зөвлөх асан Мао Жя И болон Монголд туслалцахаар ажиллаж байгаад амь үрэгдсэн хятад ажилчдад хүндэтгэл үзүүлэв.

Ёслолын хүндэтгэлтэй уур амьсгал дунд Элчин сайд Шэнь Миньжуань болон оролцогчид булш орчмын зэрлэг ургамлыг цэвэрлэж, чулууны тоосыг арчин, тэнд нойрсож буй ахмад үеийнхэн болон элэг нэгтнүүддээ цэцэг өргөж, ёслон мэхийн гашуудан дурсаж, гүн хүндэтгэл, эмгэнэлийг илэрхийлэв.

Элчин сайд Шэнь Миньжуань хэлэхдээ, зөвлөх Мао Жя И албан үүргээ үнэнчээр гүйцэтгэж, бүх хүчээ зориулан ажилласны эцэст харамсалтайгаар өвдөж, дипломат албаны тэргүүн шугамд амь үрэгдэн, эх орныхоо дипломат үйл хэрэг болон Хятад, Монголын найрамдалд амь насаа зориулсан хүн байлаа гэв. 1950–1960-аад онд 30 мянга орчим хятад ажилчид Монголд ирж, 850 гаруй төслийг хэрэгжүүлэн Монголын хөгжилд чухал хувь нэмэр оруулсны зэрэгцээ тэднээс 120 гаруй нь амь насаа алдсан юм. Тэд Хятад, Монголын харилцааны түүхэнд сэтгэл хөдөлгөм, мартагдашгүй хуудсыг бичиж, хойч үеийн сэтгэлд мөнхөд орших дурсгал болсон юм гэв.

Элчин сайд Шэнь Миньжуань онцлон хэлэхдээ, дипломат ахмад зүтгэлтэн болон Монголд тусламжаар ажилласан ажилчдын харамгүй сэтгэл, шаргуу хүчин зүтгэл нь хойч үедээ урам зоригийг тасралтгүй өгч байдаг. Бид ахмад үеийнхний үйл хэргийг үргэлжлүүлж, хөрш орнуудтай харилцах дипломат харилцааны ажлыг улам сайн хэрэгжүүлэн, Хятад, Монголын харилцааг үргэлжлүүлэн хөгжүүлэх хэрэгтэй. Мөн Монголд тусламжаар ажилласан ажилчдын үзэл санааг өвлөн, “Бүс ба зам” санаачилгын хүрээн дэх хоёр улсын өндөр чанартай хамтын ажиллагааг гүнзгийрүүлж, бодит ажлын үр дүнгээрээ ахмад үеийнхний гэгээн дурсгалыг хүндэтгэх ёстой гэв.