10 дугаар сарын 21-ний өдөр “Хятад, Монголын хамтын ажиллагааг уялдуулж, хөгжлийг хамтдаа дэмжих нь” юанийн хөрөнгө оруулалт, санхүүжилтийн 2026 оны уулзалт Улаанбаатар хотноо зохион байгуулагдлаа. Нээлтийн арга хэмжээнд БНХАУ-аас Монгол Улсад суугаа ЭСЯ-ны хэргийг Түр хамаарагч Цао Ли, Монголбанкны дэд ерөнхийлөгч Б.Анар, Хятадын Банкны Төв банкны Санхүүгийн байгууллагын газрын дэд захирал Жан Хунбао, Монголын банкны холбооны Гүйцэтгэх захирал, Ерөнхий нарийн бичгийн дарга Л.Амар нар оролцож, үг хэлэв.

ЭСЯ-ны хэргийг Түр хамаарагч Цао Ли хэлсэн үгэндээ, Хятад, Монгол хоёр улс найрсаг хөршүүд бөгөөд хоёр орны худалдаа, эдийн засгийн харилцаа эрчимтэй хөгжиж, санхүүгийн хамтын ажиллагааны боломж улам бүр өргөжиж байна. Хоёр улсын төв банк үндэсний мөнгөн тэмдэгт солилцох хэлэлцээрээ сунган байгуулж, Монголын банкууд юанийн хил дамнасан төлбөр тооцооны системд холбогдсон нь хоёр орны худалдаа, хөрөнгө оруулалтыг дэмжихэд чухал ач холбогдолтой. Хоёр улсын санхүүгийн байгууллагууд харилцан ашигтай, хамтдаа хожих зарчмыг баримтлан, юанийн чиглэлийн бизнесийн хамтын ажиллагаагаа гүнзгийрүүлж, Хятад, Монголын худалдаа, эдийн засгийн харилцааг тогтвортой, урт хугацаанд хөгжүүлэхэд хувь нэмэр оруулна гэдэгт найдаж байна гэв.

Энэхүү уулзалт нь Хятадын Банкны Төв банкнаас юанийн олон улсын хэрэглээг нэмэгдүүлэх чиглэлээр зохион байгуулж буй цуврал сурталчилгаа, танилцуулга арга хэмжээний нэг юм. Уулзалтад оролцогчид юанийн хил дамнасан хэрэглээ, хөрөнгө оруулалт, санхүүжилтийн хамтын ажиллагаа, худалдаа, эдийн засаг, санхүүгийн салбарын уялдаа холбоог бэхжүүлэх зэрэг асуудлаар санал солилцож, хэлэлцүүлэг өрнүүлэв.